Prosjekt gjev oftast større eller mindre endringar i basisorganisasjonen, med di dei fører med seg nye prosessar og strukturar, og endrar måten basisorganisasjonen vanleg arbeider på. Endringar kan ofte skapa uvisse i organisasjonen so framt dei ikkje vert handsama rett. I prosjektleiing er det difor viktig å førebu organisasjonen tidleg i prosjektgangen, og leggja ein plan for korleis endringa skal leiast. Endringsleiing er ein viktig faktor for vellukka prosjektleiing, so det er viktig at det vert opplært endringsagentar som har kunnskap til å handsama endringsleiing i samband med prosjektstyring.
I samband med endringsleiing skal det fokuserast på å skapa motivasjon i basisorganisasjonen og få til eigarskap for prosjekt. Det er eit leiingsansvar å skapa denne motivasjonen i organisasjonen, og det skal fokuserast på at ein gjennom prosjektet jamleg kommuniserer med interessentane i basisorganisasjonen som sidan vert råka av endringa. Det rekk ikkje om ein fyrst i avsluttinga av eit prosjekt dreg inn basisorganisasjonen. Det skal vera jamleg kommunikasjon.
Prosjektleiarskap handlar òg om å skapa effektivt teamsamarbeid. Prosjektarbeid er ofte ei intensiv arbeidsform, der ein samlar resursar på tvers av ein organisasjon for å levera eit avtala produkt. Arbeidsforma kan difor i mange tilfelle vika av frå den vanlege arbeidsforma åt prosjektmedlemene. Det er difor viktig at prosjektleiaren fokuserer på leiing og teamsamarbeid i prosjektet, so det vert skapt eit godt samarbeid i prosjektgruppa.